Ամենաարդյունավետ բնական միջոցները գլխամաշկի թեփի դեմ պայքարի համար

Գլխամաշկի թեփը բավական տարածված ու տհաճ խնդիր է, որը կարող է դառնալ լուրջ բարդույթների զարգացման պատճառ։ Սա վտանգավոր խանգարում չէ, սակայն այնուամենայնիվ թեփի առկայությունը կարող է հոգեբանական լուրջ տհաճություններ առաջացնել, ուստի հարկավոր է հնարավորինս շուտ ազատվել դրանից։

Բարեբաղտաբար գոյություն ունեն այս խնդրի դեմ պայքարի բավական պարզ միջոցներ, որոնք թույլ կտան հեշտությամբ վերականգնել գլխամաշկի առողջությունն ու ազատվել թեփից, ուստի ձեր ուշադրությանն ենք ներկայացնում դրանցից մի քանիսը։

Բնական յուղերի ու քացախի գործածություն 

Կոկոսյան ընկույզի յուղը հիանալի միջոց է գլխամաշկն ինչպես հարկն է խոնավացնելու համար։ Նմանատիպ ազդեցությամբ է օժտված նաև թեյի ծառի յուղը, որը նաև հզոր հակամանրէային ու հակաբորբոքային միջոց է։ Ինչ վերաբերում է խնձորի քացախին, ապա այն օգնում է խթանել գլխամաշկի վերականգնումն ու կարգավորում է pH բալանսը։ Այս բաղադրիչների համադրությունը կօգնի առավելագույնս լավ արդյունքի հասնել։ Հարկավոր է նախ մեկ թեյի գդալ խնձորի քացախն ավելացնել հասարակ շամպունին ու լվանալ գլուխը, ապա խառնել երկու ճաշի գդալ կոկոսյան ընկույզի յուղն ու 3-5 կաթիլ թեյի ծառի յուղը և քսել խառնուրդը մազերին ու գլխամաշկին։ այս պրոցեդուրայից հետո գլուխը հարկավոր է ծածկել պոլիէթիլենային գլխարկով , թողնել դիմակը կես ժամ, որից հետո կրկին լվանալ մազերը։

Գլխամաշկի թեփի դեմ շամպունի գործածություն

Գոյություն ունեն նաև գլխամաշկի թեփի դեմ պայքարի համար նախատեսված հատուկ շամպուններ, որոնք հաճախ շատ արդյունավետ են լինում։ Սակայն նման միջոցների ընտրության հարցում հարկավոր է շատ ուշադիր լինել ու հաշվի առնել մազերի առանձնահատկությունները։ Օրինակ՝ ներկած վարսեր ունեցողներին խորհուրդ է տրվում կիրառել առանց սուլֆատների շամպուն, ուստի նման դեպքերում դրա բաղադրությունն ուսումնասիրելը շատ կարևոր է։

Սթրեսի մակարդակի նվազեցում

Սթրեսը թուլացնում է մարդու իմունային համակարգն ու խիստ բացասաբար ազդեցություն է ունենում օրգանիզմի վրա։ Այն կարող է խորացնել այնպիսի տհաճ ախտանշանները, ինչպիսին են մաշկի քորն ու չորությունը, ուստի զարմանալի չէ, որ սթրեսը կարող է ուղեկցվել նաև գլխամաշկի թեփոտվածությամբ։ Սթրեսով պայմանավորված թեփից ազատվելու համար հարկավոր է փորձել առաջին հերթին վերականգնել հոգեկան կայունությունն ու նվազեցնել սթրեսի մակարդակը։ Այս հարցում հիանալի օգնական կարող են լինել մեդիտացիաները, յոգան, տաք լոգանքը և այլն։

Օմեգա-3 ճարպաթթուների գործածություն

Գլխամաշկի թեփի դեմ պայքարում շատ կարևոր է նաև օմեգա-3 ճարպաթթուներով հարուստ մթերիք գործածությունը, քանի որ այս ճարպաթթուներն օգնում են օրգանիզմին կարգավորել յուղերի արտազատման, մաշկի խոնավացման ու վերքերի ապաքինման գործընթացները։ Այս տարրերով առավել հարուստ են յուղոտ ձկնատեսակները, սերմերն ու հունական ընկույզները, ուստի սննդակարգում դրանք ներառելը կարող է շատ արդյունավետ լինել։

Պրոբիոտիկների գործածություն

Պրոբիոտիկներն օգտակար բակտերիաներ են, որոնք ամրապնդում են իմունային համակարգը և դրական ազդեցություն են ունենում ամբողջ օրգանիզմի, այդ թվում նաև գլխամաշկի ու վարսերի վրա։ Բավարար քանակությամբ պրոբիոտիկներ ստանալու համար հարկավոր է օգտագործել խմորում անցած սննդամթերքի տեսակներ, որոնց շարքին են դասվում կեֆիրը, յոգուրտը, թթու կաղամբը և այլն։ Բացի այդ, կարելի է նաև պրոբիոտիկներն ընդունել սննդային հավելումների տեսքով, որոնք կարելի է գնել դեղատներից։

Նյութի աղբյուրը՝ onegoodthingbyjillee.com