Կորոնավիրուսը կարող է բացասաբար անդրադառնալ վերարտադրողական առողջության վրա․ սեքսոպաթոլոգ

COVID-19 վարակը կարող է անդրադառնալ տղամարդկանց վերարտադրողական գործառույթների վրա։ Այս մասին Tert.am Medicine-ի հետ զրույցում ասաց ԵՊԲՀ Սեքսոպաթոլոգիայի կլինիկայի բժիշկ-սեքսոպաթոլոգ, սեքսոլոգիայի ամբիոնի դասախոս, բ․գ․թ․, դոցենտ Վրեժ Շահրամանյանը՝ անդրադառնալով մարդու վերարտադրողական առողջության վրա նոր կորոնավիրուսի ունեցած հնարավոր ազդեցությանը։

«Մեր դիտարկումները ցույց են տվել, որ որքան ծանր է լինում կորոնավիրուսի ընթացքը, այնքան սպերմատազոիդների քանակն ու շարժունակությունը նվազում է: Դա բացատրվում է նրանով, որ կորոնավիրուսը կարող է «թաքնվել» ամորձիներում, ինչը տղամարդկանց ավելի խոցելի է դարձնում այդ վարակի հանդեպ», – բացատրեց մասնագետը՝ շեշտելով, որ ամորձիներում վիրուսը կարող է ավելի երկար մնալ, քան այլ օրգաններում, ինչի արդյունքում ամորձիները դառնում են «պահեստարաններ», որոնց շնորհիվ վարակը պահպանվում է։

Բժշկի խոսքով՝ վարակը կարող է առաջացնել օրխիտ՝ ամորձիների բորբոքում, ինչն էլ իր հերթին կարող է տղամարդու մոտ հանգեցնել սերմնաբջիջների քանակի և որակի նվազման:

«Նման եզրահանգման են եկել նաև չինացի հետազոտողները, որոնք կորոնավիրուսով վարակված տղամարդկանց սերմնահեղուկի մեջ հայտնաբերել են կորոնավիրուսի նոր տեսակ՝ SARS-CoV-2», – նշեց մասնագետը՝ հավելելով, որ հետազոտությունների ժամանակ կորոնավիրուս է հայտնաբերվել 18-59 տարեկան 40 հիվանդի սերմնահեղուկի մեջ:

Ինչ վերաբերում է հետագա բարդությունների կանխարգելմանը, ապա դրանցից խուսափելու համար մասնագետը խորդհուրդ տվեց կորոնավիրուսով վարակված տղամարդկանց անպայման խորհրդատվության համար դիմեն բժիշկներին՝ պարզելու հիվանդությունն իրենց վերարտադրության վրա բացասական ազդեցութուն թողել է, թե ոչ:

«Ժամանակին ցուցաբերված բժշկական օգնությունը թույլ կտա հնարավորինս շուտ հայտնաբերել խնդիրը և կարգավորել այն։ Կրած COVID-19 վարակից հետո տղամարդու վերարտադրողական ֆունկցիան նպատակահարմար է գնահատել նաև ապաքինվելուց առնվազն երեք ամիս հետո», - եզրափակեց բժիշկ Շահրամանյանը։