Ռուսական օդանավը խախտել է Թուրքիայի օդային տարածքը. ՆԱՏՕ-ի գլխավոր քարտուղար

22.46

---

Բրյուսելում կայացել է ՆԱՏՕ-ի արտակարգ հանդիպումը` այդ կառույցի անդամ Թուրքիայի կողմից ռուսաստանյան Սու - 24 ռազմական օդանավի խոցման բերումով:

Russia Today-ը հայտնում է, որ ՆԱՏՕ-ի գլխավոր քարտուղար Սթոլթենբերգի հայտարարության համաձայն` կառույցը գտնում է, որ ռուսաստանյան օդանավը խախտել է Թուրքիայի օդային տարածքը:

ՆԱՏՕ-ն կոչ է արել թուլացնել օդանավի կործանման միջադեպից հետո առաջացած լարվածությունը Անկարայի ու Մոսկվայի միջև:

ՆԱՏՕ-ի գլխավոր քարտուղարը տեղեկացրել է, որ միջադեպի վերաբերյալ զրուցել է Թուրքիայի վարչապետ Ահմեդ Դավութօղլուի հետ, իսկ Թուրքիայի դեսպանը Հյուսիսատլանտյան դաշինքին տեղեկացրել է վերջին զարգացումների մասին։

«Թուրքիան տեղեկացրել է դաշնակիցներին Թուրքիայի օդային սահմանը խախտած ռուսական ռազմական ինքնաթիռի անկման մասին։ Նախկինում ես հայտնել էի իմ մտահոգությունները ՆԱՏՕ-ի սահմանների մերձակայքում Ռուսաստանի Դաշնության կողմից ռազմական գործողությունների իրականացման վերաբերյալ։ Սա ընդգծում է ձեռք բերված պայմանավորվածությունները հարգելու կարևորությունը՝ ապագայում նման միջադեպերից խուսափելու համար»,- ասել է Սթոլթենբերգը՝ հավելելով, որ իրենք շարունակելու են ուշադիր հետևել ՆԱՏՕ-ի հարավարևելյան սահմանին տիրող զարգացումներին։

22.28

---

Ռուսաստանի ՊՆ-ն հայտարարել է, որ դադարեցնում է ռազմական բնույթի կոնտակտները Թուրքիայի հետ, հայտնում է Reuters-ը:


22.26

---

Սիրիայում ռուսական ռազմածովային ուժերի զինծառայող է զոհվել. ինչպես հայտնում է meduza.io-ն՝ ՌԴ գլխավոր հրամանատարությունից ասել են, որ զինծառայողը զոհվել է Սու-24 ռմբակոծիչի կործանման վայրում  որոնողափրկարարական աշխատանքներ իրականացնելու ժամանակ։  

22.00

---

Թուրքիան իրավունք ունի պաշտպանել իր օդային տարածքը. Ֆրանսիայի նախագահ Օլանդի հետ հանդիպմանը ԱՄՆ-ի նախագահ Բարաք Օբաման, ի թիվս այլ հայտարությունների, խոսել է նաև Թուրքիայի կողմից ռուսաստանյան Սու - 24 օդանավի խոցման մասին:


21.47

---

Անկարայի անվտանգության կառույցների տվյալներով՝ թուրք-սիրիական սահմանի մոտ կործանված ինքնաթիռից ինքնանետված օդաչուները ողջ են:

Ինչպես տեղեկացնում է Hurriyet  թերթի կայքը, օդաչուներն այժմ սիրիական ընդդիմության մոտ են:

21.01

---

ՌԴ Նախագահի մամլո քարտուղար Դմիտրի Պեսկովը հայտարարել է, որ Վլադիմիր Պուտինը չի խոսել Թուրքիային հավանական ռազմական պատասխան տալու մասին:

«Թուրքիայի գործողությունները ռուսական Սու-24 ինքնաթիռի նկատմամբ խիստ վրդովմունք և հիասթափություն  են առաջացնում», - ասել է նա։ 

20.35

---

ԱՄՆ պաշտպանության նախարարությունը հայտնել է, որ ամերիկացի զինվորականները որսացել են ռադիոձայնային տվյալները, որոնցում լսվել է, որ թուրքական ինքնաթիռների օդաչուները հարձակումից առաջ նախազգուշացրել էին ռուսական Սու-24-ի օդաչուներին Թուրքիայի օդային տարածք ներխուժելու մասին: 

Իսկ Մեծ Բրիտանիայի վարչապետ Դևիդ Քեմերոնը ռուսական Սու-24 կործանիչի խոցումից հետո կոչ է արել Թուրքիայի և Ռուսաստանի իշխանություններին ուղիղ կապի մեջ մտնել:

19.47

---

Ռուսաստանի Դաշնային խորհուրդը առաջարկել է դադարեցնել ավիահաղորդակցությունը Թուրքիայի հետ. «Թուրքիան պետք է ընդգրկվի այն երկրների շարքը, որոնց հետ Ռուսաստանը դադարեցրել է ավիահաղորդակցությունը, ռուս զբոսաշրջիկները չպետք է գտնվեն այդ երկրում, որտեղ անվտանգ չէ»:

19.41

---

Ռուսական Սու-24 ինքնաթիռը խոցվել է Սիրիայում գտնվող օդակայան վերադառնալիս. այս մասին հայտարարել է Ռուսաստանի Դաշնության պաշտպանության նախարարությունը։ 

«Սու-24-ը կործանելու Թուրքիայի գործողությունը  ոչ բարեկամական քայլ է»,–Ռուսաստանի ՊՆ-ն Սիրիայում Թուրքիայի գործողությունները, որը խոցել է ռուսական Սու-24 ինքնաթիռը, դիտարկում է  որպես ոչ բարեկամական քայլ:

РИА Новости-ի հաղորդմամբ` այս մասին հայտնել է ռազմական գերատեսչության մամլո ծառայությունը:

19.02

---

Ռուսաստանի արտգործնախարար Սերգեյ Լավրովը հետաձգել է իր այցը Թուրքիա: Այդ երկրում նախատեսվում էր Ռուսաստանի և ԱՄՆ-ի արտաքին գերատեսչությունենրի ղեկավարների հանդիպումը` Սիրիայի կարգավորման հարցով: 

Ռուսաստանի ԱԳՆ-ն նաև այդ երկրի քաղաքացիներին հորդորել է զերծ մնալ Թուրքիա այցելություններից:
 

18.44

---

Ռուսական Սու-24 ռազմական ինքնաթիռի հետ կապված միջադեպի ֆոնին կարգուկանոնի պահպանման նպատակով թուրքական ՕՄՕՆ-ը շրջապատել է ՌԴ հյուպատոսությունը Ստամբուլում: 

17.48

---

Թուրքիայի վարչապետ Ահմեթ Դավութօղլուն հայտարարել է, թե իր երկիրն իրավունք է ունեցել անել անհրաժեշտը՝ անվտանգության ապահովման համար:

16.59

---

Ռուսաստանի նախագահ Վլադիմիր Պուտինը Սիրիայում ռուսական Սու-24 ռազմական ինքնաթիռի վրա հարձակումը «թիկունքից հարված» է անվանել, հաղորդում է РИА Новости-ն։ 

Պուտինի խոսքով՝ ռուսական կործանիչի հետ կապված միջադեպը դուրս է ահաբեկչության դեմ պայքարի շրջանակներից։

«Ռուս օդաչուները և ինքնաթիռը ոչ մի կերպ չեն սպառնում Թուրքիային, դա ակնհայտ է»,- ասել է Պուտինը: Նա նաև հայտարարել է, որ ռուսական ինքնաթիռի վրա հարձակումը եղել է Թուրքիայի հետ սահմանից 1 կիլոմետր հեռավորության վրա, իսկ ինքնաթիռն ընկել է 4 կիլոմետր հեռավորության վրա:

Ռուսաստանի նախագահը հայտարարել է, որ իր երկիրը Թուրքիային միշտ վերաբերել է որպես բարեկամական պետության։



«Մենք կուսումնասիրենք ամենը, ինչ տեղի է ունեցել, և ողբերգությունը կունենա լուրջ հետևանքներ, այդ թվում՝ և ռուս-թուրքական հարաբերությունների համար: Մենք միշտ վերաբերել ենք Թուրքիային որպես բարեկամական պետության: Չգիտեմ՝ ում էր պետք այն, ինչ արվել է այսօր, բայց ամեն դեպքում՝ ոչ մեզ»,- ասել է Պուտինը։

Պուտինը հավելել է, որ Թուրքիան հարված է հասցրել ՌԴ ինքնաթիռին՝ չնայած նրան, որ Ռուսաստանն ԱՄՆ-ի հետ նման միջադեպերի կանխման մասին համաձայնագիր է կնքել:

Նա նշել է նաև, որ ՌԴ-ն վաղուց գրանցել է, որ Թուրքիայի տարածքում շատ նավթ կա ԻՊ-ի հսկողության տակ գտնվող նավթահանքերից:

 

---

16.17

Թուրքիան Ռուսաստանի դեսպանին կանչել է ԱԳՆ՝ ռուսական Սու-24 ռազմական ինքնաթիռի խոցման միջադեպի հետ կապված, տեղեկացնում է РИА Новости  գործակալությունը:

Թուրքիայի պահանջով այսօր արտահերթ նիստ է գումարելու ՆԱՏՕ-ն՝ քննարկելու ինքնաթիռի հետ կապված միջադեպը։

«Հյուսիսատլանտյան դաշինքի նիստը տեղի է ունենալու այսօր՝ ժամը 17:00-ին (երևանյան ժամանակով ժամը 20.00-ին)՝ Թուրքիայի պահանջով»,-ասել է ՆԱՏՕ-ի ներկայացուցիչը՝ նշելով, որ մամուլի համար որևէ միջոցառում չի նախատեսվում։

 

---

15.19

 

ՌԴ նախագահի մամուլի քարտուղար Դմիտրի Պեսկովը հայտարարել է, որ Կրեմլում հստակ գիտեն՝ ռուսական ինքնաթիռը Թուրքիայի օդային տարածք չի մտել, տեղեկացնում է НТВ-ն։

«Ամեն դեպքում մենք Պաշտպանության նախարարությունից դեռ հստակ չենք լսել մեր ինքնաթիռի կործանման պատճառը։ Մենք գիտենք, որ ինքնաթիռը գտնվել է Սիրիայի օդային տարածքում»,-ասել է Պեսկովը:

 

 Մամուլի քարտուղարն ասել է, որ նախագահ Պուտինն ընդունել է, որ «սա շատ լուրջ դեպք է», սակայն վաղաժամ եզրակացություններ անելը սխալ է:

---

 

15.04 

Թուրքիայի զինված ուժերը հրապարակել է Սիրիայի սահմաններում կործանված ռուսական ինքնաթիռի հետագծի պատկերը, որում երևում է, որ ռուսական կործանիչը հատել է Թուրքիայի տարածքը։

 

Քարտեզի վրա կարմիրովը խփված ռուսական ինքնաթիռի հետագիծն է, իսկ մոխրագույնը՝ թուրքական F-16-ինը, որը, համաձայն թուրքական կողմի պնդումների, մի քանի անգամ զգուշացրել է ռուսական կողմին:

---

13.38

 

Սիրիայում ռուսական ինքնաթիռը կործանվել է ենթադրաբար ցամաքից հրթիռակոծման հետևանքով. ինչպես տեղեկացնում է РИА Новости գործակալությունը, այդ մասին հայտարարել է ՌԴ պաշտպանության նախարարությունը:

Մինչդեռ թուրքական կողմի պնդմամբ՝ ինքնաթիռը, Թուրքիայի օդային տարածքը խախտելուց հետո, մի քանի նախազգուշացում է ստացել, ապա խոցվել է թուրքական կործանիչների միջոցով։
 

ՌԴ ՊՆ-ի հաղորդմամբ՝ խոցման պահին ինքնաթիռը գտնվել է 6000 մետր բարձրության վրա: Օդաչուների ճակատագիրը ճշտվում է։

«Պաշտպանության նախարարությունը նշում է, որ ողջ թռիչքի ընթացքում ինքնաթիռը բացառապես գտնվել է Սիրիայի օդային տարածքում: Դա գրանցվել է»,-ասված է ՊՆ-ի տարածած հաղորդագրության մեջ։

Թուրքական կողմն իր հերթին հայտարարել է, թե միջադեպի առնչությամբ պատրաստվում են դիմել ՄԱԿ-ին, ինչպես նաև ՆԱՏՕ-ի գործընկերներին:

 

---

13.11

 

Թուրքիայի նախագահ Ռեջեփ Թայիփ Էրդողանը հաստատել է, որ թուրք զինվորականները ռուսական Սու-24 ինքնաթիռ են խոցել, հայտնում է gazeta.ru-ն։

Թուրքական լրատվամիջոցները հաղորդում են, որ Էրդողանը հանդիպել է ԶՈՒ գլխավոր շտաբի պետի հետ և մանրամասն տեղեկություններ ստացել խոցված ինքնաթիռի մասին:

Ռուսական կողմի պնդմամբ՝ ինքնաթիռը թռիչք է իրականացրել բացառապես Սիրիայի տարածքում, սակայն թուրքական կողմը պնդում է հակառակը՝ նշելով, որ այդ ինքնաթիռը թուրքական օդային տարածքը 5 րոպեում խախտել է 10 անգամ:

 

---

 

12.50

ՌԴ պաշտպանության նախարարությունից հայտնել են, որ թուրք-սիրիական սահմանին այսօր կործանվել է ռուսական ավիախմբի կազմում ընդգրկված Սու-24 ռազմական ինքնաթիռը։ Գերատեսչությունից հայտնել են, որ ինքնաթիռը չի խախտել Թուրքիայի օդային տարածքը։ 

 

 

---

Թուրք-սիրիական սահմանին այսօր կործանված ինքնաթիռը, հավանաբար, ռուսական է, հայտնում են թուրքական լրատվամիջոցները։

 

Թուրք զինվորականների պաշտոնական ներկայացուցիչները հաստատել են, որ թուրք-սիրիական սահմանին ինքնաթիռը խոցվել է իրենց կողմից՝ թուրքական սահմանը հատելու պատճառաբանությամբ, տեղեկացնում է BBC-ի թուրքական ծառայությունը:

 

Համաձայն տարածված տեղեկությունների՝ խոցված ռուսական ինքնաթիռն ընկել է Լաթաքիայի մոտակայքում:

 

Ավելի վաղ Թուրքիայի և Ռուսաստանի հարաբերությունները լարվել էին ռուսական ինքնաթիռների՝ Սիրիայի տարածքում ավիահարվածներ հասցնելու ընթացքում Թուրքիայի օդային սահմանը հատելու պատճառով։ Թուրքիան իր բողոքն էր հայտնել Ռուսաստանին՝ Անկարայում երկրի դեսպանին արտգործնախարարություն կանչելով:

 

Համացանցում տարածվել է ինքնաթիռի կործանման պահի տեսագրությունը: Հաղորդվում է, որ հավանաբար օդաչուները հասցրել են ինքնանետվել:

 

Թուրքիայի վարչապետ Ահմեթ Դավութօղլուն Սիրիայի սահմանին տեղի ունեցող վերջին իրադարձությունների մասին տեղեկացել է երկրի արտգործնախարար Ֆերիդուն Սինիրլիօղլուից և ԶՈՒ գլխավոր շտաբի պետ Հուլուսի Աքարից: