Քաղցկեղի որ տեսակներն են առավել հաճախ ախտորոշվում հղիության ընթացքում

Հղիության ընթացքում օնկոլոգիական հիվանդություններ բավական հազվադեպ են հայտնաբերվում, իսկ ախտորոշվելու դեպքում էլ հիմնականում 30-35 տարեկանից բարձր կանանց մոտ։ Այս մասին Газета.Ru-ի հետ զրույցում հայտնել է ուռուցքաբան Յուլիա Վախաբովան։

«Առավել հաճախ դա կրծքագեղձի քաղցկեղն է, արգանդի վզիկի քաղցկեղը, լեյկոզը և լիմֆոման: Արդեն ապացուցված է, որ հղիության ընթացքում կնոջ մոտ հորմոնալ ֆոնը չի նպաստում ուռուցքի աճին։ Քանի որ նման իրավիճակում չարորակ նորագոյացություններն ամենատարածված խնդիրը չեն, բժիշկները դեռևս չունեն նման իրավիճակում գործելու համընդհանուր ալգորիթմներ։ Յուրաքանչյուր դեպքում դա որոշվում է անհատական առաձնահատկություններից ելնելով»,- մեկնաբանել է բժիշկը։

Ինչպես նշել է Վախաբովան, որոշումն այն մասին, թե ինչ է հարկավոր անել, պետք է կայացնի ոչ թե մեկ մասնագետ, այլ մի ամբողջ խումբ, որը բաղկացած կլինի ուռուցքաբանից, մանկաբարձ-գինեկոլոգից, վերարտադրողական առողջության մասնագետից, գենետիկից, պերինատոլոգից և այլն։ Միաժամանակ բժիշկները հաշվի են առնում հիվանդի վիճակը, հղիության ժամկետը, քաղցկեղի գենոտիպը, ուղեկցող ախտաբանությունների առկայությունը և այլն։

«Սակայն ինչպիսի իրավիճակ էլ լինի, պետք է հիշել, որ բուժումն ամեն դեպքում պետք է սկսել և դա պետք է անել անմիջապես։ Քաղցկեղը հիվանդություն է, որի դեպքում չի կարելի սպասել։ Երբեմն նույնիսկ մի քանի շաբաթ ուշացնելը կարող է վտանգել ինչպես մոր, այնպես էլ պտղի կյանքն ուռուցքի արագ աճի պատճառով։ Հավանաբար, հղիության ժամանակ նման ախտորոշման դեպքում կինն ստիպված կլինի դժվար որոշում կայացնել, սակայն այժմ բժշկությունն ամեն ինչ անում է երկուսի կյանքը փրկելու համար։ Հղիության ընթացքում քաղցկեղի ախտորոշումն այժմ խնդիր չէ։ Կան հաստատված մեթոդներ, որոնք թույլ են տալիս պրոցեդուրան իրականացնել առանց պտղին վնաս պատճառելու»,- եզրափակել է ուռուցքաբանը։