«Չեմ ձգտում իմ տարիքից ավելի մեծ երևալ». 17-ամյա Իլոնա Մկրտչյանի նոր ֆոտոշարքն ու տարիքից մեծ երևալու քննարկումները

13:44 • 04.06.20

Շոուբիզնես

Երիտասարդ դերասանուհի Իլոնա Մկրտչյանը, ով լսարանին հայտնի դարձավ «Փափուկ խաղալիք» սիթքոմից, նոր ֆոտոշարք ունի, որն իրականացրել է «Թղթե տնակ» սերիալի մոտիվներով։

Իլոնան ֆոտոշարքը տրամադրել է Tert.am Life-ին ու պատմել, որ գաղափարը ծնվել է հետևորդների շնորհիվ, որոնք իրեն հաճախ գրում էին, որ շատ նման է հայտնի ֆիլմի հերոսներից մեկին` Տոկիոյին։

«Առաջին լուսանկարը հրապարակելուց հետո շատ ակտիվ արձագանքներ եղան, որոշել եմ հոլովակներ ներկայացնել, որոնցում կներկայանամ տարբեր կերպարներով»,- ասաց նա։

«Փափուկ խաղալիքը» Իլոնային հայտնիություն բերեց, ինչը 17 ամյա աղջկա համար շատ հաճելի է։ Ասում է` մարդկանց ջերմությունն իրեն ուրախացնում է։

Նախագծի ավարտից հետո Իլոնան որպես դերասանուհի ներկայանալու նոր առաջարկներ դեռ չունի, հուսով է` կունենա։ Նա նշեց, որ որպես մոդել է առաջարկ ստացել, սակայն այն դեռ քննարկման փուլում է։

«Առայժմ միայն ֆոտոմոդելինգով եմ զբաղվում։ Եթե առաջարկ լինի պոդյումում լինելու, կսովորեմ և կզբաղվեմ նաև պոդյումային մոդելինգով»,- ասաց նա, իսկ հարցին` ի՞նչ պարամետրեր ունի, պատասխանեց, որ հասակը 1.62 սմ է, քաշը` 43 կգ, իսկ ահա չափսերը չգիտի։

Իլոնայից հետաքրքրվեցինք` ապագայում իրեն ավելի շատ որպես մոդե՞լ, թե՞ դերասանուհի է տեսնում. «Ուզում եմ ճանապարհս շարունակել որպես դերասանուհի։ Տեսնենք` ինչպես կստացվի։ Հիմա սովորում եմ Ճարտարագիտական համալսարանի քոլեջում` Դիզայնի բաժնում, հետագայում ուզում եմ ուսումս շարունակել Թատերական ինստիտուտում` ռեժիսորական կամ դերասանական բաժնում։ Շատ եմ ուզում նաև թատրոնում խաղալ։ Ես այս ոլորտը շատ եմ սիրում, իսկ դա շատ է կարևոր է։ Եթե մի բան հաճույքով ես անում, աշխատանք չի դառնում։ Յուրաքանչյուր ոլորտում կարող ես հաջողել, եթե սիրով աշխատես ու չզլանաս»։

Իլոնան 17 տարեկան է։ Շատերը նկատում են, որ նա իր տարիքից մեծ է երևում։ Աղջիկը վստահեցնում է` շուտ մեծանալ չի ուզում։

«Ես չեմ ձգտում ավելի մեծ երևալ, բայց մարդկանց աշխարհընկալումը տարբեր է` մեկին ասում են` մեծ ես երևում, մյուսին` փոքր,- ասաց նա, իսկ դիտարկմանը, գուցե շպարի շատ կիրառությո՞ւնն է նման կարծիք ստեղծում, արձագանքեց,- Էկրանից և Ինստագրամից մարդիկ ինձ շպարով են տեսնում, բայց առօրյայում, գրեթե, չեմ շպարվում։ Հաճախ առօրյայում ասում են, որ ավելի փոքր եմ երևում, երբեմն էլ, դժվարությամբ են նույնացնում «Փափուկ խաղալիքի» կերպարիս հետ։ Ասում են` այնտեղ մեծ եմ երևում, իրականում` ոչ»։

Լուսանկարները` Վահագն Ավանեսյանի