Երբ է դրվում անպտղություն ախտորոշումը և երբ է պետք դիմել բժշկի․ պարզաբանում է սեքսապաթոլոգ Սևադա Հակոբյանը

Հայ Ամերիկյան Առողջության Կենտրոնի սեքսապաթոլոգ, դոցենտ Սևադա Հակոբյանն անդրադարձել է անպտղության խնդրին՝ նշելով, թե երբ է դրվում անպտղություն ախտորոշումը և երբ է պետք դիմել բժշկի․

«Ընդունված է համարել, որ ամուսնական զույգը, որը շուրջ մեկ տարի ապրում է ռեգուլյար սեռական կյանքով, բեղմնականխիչ մեթոդներ չեն կիրառում և այդ պարագայում չի արձանագրվում հղիություն, ապա պետք է համարել որպես անպտղություն և դիմել բժշկի՝ պարզելու առկա է տղամարդու անպղություն, կանացի անպտղություն, թե համակցված տեսակն է:

Սա համարվում է առաջնային անպտղություն, իսկ երկրորդային անպտղության ժամանակ գրանցված հղիությունից հետո է առաջանում երեխա ունենալու հետ կապված խնդիրները:

Ցավոք սրտի համաշխարհային տվյալներով գրանցվում է անպտղության ցուցանիշների աճման տենդենց. սա հաճախ պայմանավորված է էկոլոգիական վատթարացող գործոններով, անառողջ սննդամթերքի տեսակարար չափաբաժնի ավելացմամբ՝ ինչը նաև հորմոնալ խանգարումների պատճառ կարող է հանդիսանալ, վնասակար սովորույթներով, խրոնիկական հիվանդություններով (բորբոքային, սիրտանոթային, պարբերական հիվանդություն, դիաբետ), հիպոդինամիա (սակավաշարժություն), ավելորդ քաշ, ռադիացիա:

Այս պարագայում իհարկե առավել արդյունավետ է համարվում ֆերտիլության (պղաբերության) ցուցանիշների խանգարումների վաղ հայտնաբերումը և կանխարգելումը. խոսքը վերաբերվում է նաև սեռահասուն տարիքի տղաների և աղջիկների մոտ վերարտադրողական ֆունկցիայի ուսումնասիրման որոշ կանխարգելիչ հետազոտությունների անցկացմանը:

Առավել արդյունավետ է, որպեսի զույգերը, որոնք պատրաստվում են երեխա ունենալ, անցնեն որոշ պարտադիր հետազոտություներ, խնդիրների ավելի վաղ հայտնաբերման և կանխարգելման համար»: